༄༅། སྤྱི་ལོ་༢༠༡༧ ལོའི་སུད་སུ་ས་གནས་མདོ་སྨད་ཀྱི་དབྱར་སྐྱིད་འདི་ལོའི་སྤྱི་ཟླ་དྲུག་པའི་ཚེས་༠༣ནས་༠༥བར་ས་གནས་EINSIEDELN་ནས་ཚོགས་ཡོད་པ་དང་། དབྱར་སྐྱིད་སྐབས་མདོ་སྨད་པ་༢༥༠་ཙམ་ཕེབས་འདུག ཐེངས་འདིའི་དབྱར་སྐྱིད་ཀྱི་སྐུ་མགྲོན་གཙོ་བོ་ནི་ཨ་མ་རྗེ་བཙུན་པདྨ་དང་སྐུ་ངོ་བསྟན་པ་རྣམ་གཉིས་ཡིན་པ་དང་ཁོང་རྣམ་གཉིས་ནས་བོད་མི་ཡོངས་རྡོག་རྩ་གཅིག་སྒྲིལ་དང་སོ་སོའི་བྱིས་བ་རྣམས་ལ་བོད་ཡིག་དང་བོད་ཀྱི་རིག་གཞུང་ངོ་སྤྲོད་བྱས་ནས་མ་འོངས་པར་བོད་མིའི་རྩ་དོན་ལ་འགན་ཁུར་ཐུབ་པ་རྐྱང་གསོ་སྐྱོང་གནང་དགོས་ལུགས་ལམ་སྟོན་བཀའ་སློབ་གནང་། དབྱར་སྐྱིད་སྐབས་ལས་ཐོག་རྒྱུན་ལས་རྣམས་ཀྱིས་མདོ་སྨད་རྒན་རབས་པ་དང་རྒྱུན་ལས་ཟུར་བ་རྣམས་དམིགས་བསལ་སྐུ་མགྲོན་དུ་མགྲོན་བརྡ་བཏང་འདུག སྤྲོ་སྐྱིད་ཀྱི་བཟའ་བཏུང་གི་འགྲོ་སོང་ཡོངས་རྫོགས་ས་གནས་མདོ་སྨད་པ་གཏོང་ཕོད་ཅན་ཞིག་གིས་སྦྱིན་བདག་གནང་འདུག སྤྲོ་སྐྱིད་སྐབས་རྒྱུན་ལས་རྣམས་ཀྱིས་ལོ་འཁོར་གྱི་རྩིས་ཁྲ་དང་ལས་བསྡོམས་མི་མང་ལ་སྙན་སྒྲོན་ཞུས་བ་དང་། སྤྲོ་སྐྱིད་སྐབས་ཕེབས་ཞུགས་པ་ཡོངས་ཉིན་གསུམ་བསྟུན་མར་དགའ་བའི་བྲོ་དང་སྐྱིད་པའི་ཆང་། སྙན་པའི་གཞས་ལ་རོལ་ནས་ཆེས་བདེ་སྐྱིད་ལྡན་པའི་འདུ་འཛོམས་དང་སྤྲོ་སྐྱིད་ཅིག་ཆགས། ཐེེངས་འདིའི་དབྱར་སྐྱིད་ནི་མི་མང་ཆེས་མང་ཤོས་ཀྱི་འདུ་འཛོམས་ཤིག་ཀྱང་ཆགས།