སྤྱི་ལོ་༢༠༡༧ཟླ༠༣པའི་ཚེས་༢༥ཉིན་སུད་སིའི་ས་གནས་མདོ་སྨད་རྒྱུན་ལས་རྣམས་ཀྱིས་གཙོས་ས་གནས་མདོ་སྨད་མི་མང་རྣམས་ཆུ་ཚོད་༡༡་༠༠་ནས་ཉིན་རྒྱབ་ཆུ་ཚོད་༡༧་བར་ས་གནས་VOLKETSWIL་ལ་འཛོམས་སྟེ། ཚོགས་འདུའི་བརྗོད་གཞི་གཙོ་བོ་ཉེ་སྔོན་ཨ་ཚོགས་ཀླུ་མཁར་བྱམས་སོགས་ཀྱིས་༧སྤྱི་ནོར་གོང་ས་སྐྱབས་མགོན་ཆེན་པོ་མཆོག་ལ་གཞི་མེད་ཀྱི་སྐྱོན་འཛུགས་དང་ཟུར་ཟ་བྱས་བར་ངོ་རྒོལ་དང་། ས་གནས་མདོ་སྨད་མི་མང་གི་ངོས་ནས་ ༧གོང་ས་མཆོག་དང་དབུས་བོད་མིའི་སྒྲིག་འཛུགས་ལ་གཞི་མེད་སྐྱོན་འཛུགས་བྱེད་མཁན་བོད་མི་རེ་ཟུང་འབྱུང་བཞིན་པའི་ཐད་གྲོས་ཆོད་བཞག་ཡོད་འདུག
དབུས་མདོ་སྨད་སྤྱི་ཁྱབ་རྒྱུན་ལས་ཁང་གིས་ས་གནས་མདོ་སྨད་རྒྱུན་ལས་ཁག་ལ་ས་གནས་མི་མང་རྣམས་བསྡུ་སྐུང་གིས་དམིགས་བསལ་ཚོགས་འདུ་འཚོག་དགོས་པའི་བཀའ་ཁྱབ་གནང་བ་ལྟར། གོང་ཚེས་ཉིན་སུད་སི་ས་གནས་མདོ་སྨད་རྒྱུན་ལས་ངོས་ནས་མི་མང་ལ་བརྡ་ཁྱབ་དང་མི་མང་བསྡུ་སྐུང་གནང་སྟེ། ཀླུ་མཁར་བྱམས་གཙོས་པའི་བོད་པའི་སྤྱི་ཚོགས་ནང་ ༧གོང་ས་མཆོག་དང་དབུས་བོད་མིའི་སྒྲིག་འཛུགས་ལ་གཞི་མེད་སྐྱོན་འཛུག་བྱེད་མཁན་བོད་མི་རེ་ཟུང་འབྱུང་བཞིན་པའི་ཐད། མི་མང་གི་ངོས་ནས་སེམས་ཚོར་ཆེན་པོས་ངོ་རྒོལ་དང་། མ་འོངས་པར་བོད་ཀྱི་སྤྱི་ཚོགས་ནང་དཀྲུག་རྐྱེན་སློང་མཁན་དེ་རིགས་མི་ཡོང་བའི་ཆེད་མི་མང་གིས་མང་མོས་གྲོས་ཆོད་གཏན་འབེབ་བཅས་གནང་ཡོད་འདུག
ཚོགས་འདུའི་ཐོག་ཚོགས་བཅར་བ་ས་གནས་མདོ་སྨད་མི་མང་སུམ་བཅུ་ལྷག་མཉམ་ཞུགས་དང་སོ་སོའི་བསམ་ཚུལ་བརྗོད། དབུས་མདོ་སྨད་སྤྱི་ཁྱབ་རྒྱུན་ལས་ཀྱིས་བཞག་པའི་གྲོས་ཆོད་དེ་དག་དང་ས་གནས་སུད་སི་མདོ་སྨད་ཀྱི་གྲོས་ཆོད་གསར་པ་ཁག་ཅིག་ལ་མི་མང་གིས་མང་མོས་ཐོག་གཏན་འབེབ་ཁ་སྣོན་བཅས་བྱུང་བ་ཁག་གཤམ་གསལ།
གསར་འགོད་པ། དབང་གྲགས།