སུད་སིའི་ས་གནས་མདོ་སྨད་རྒྱུན་ལས་ཁང་འདི་སྤྱི་ལོ་༡༩༨༦ ལོའི་ཟླ་༥ ཚེས་༢༣ ཉིན་དབུ་བརྙེས། ཐོག་མར་སྒྲིག་འཛུགས་འདི་ཉིད་གསར་འཛུགས་གནང་མཁན་གྱི་གྲས་སུ་རི་ཀོང་ཆོས་འཁོར་དགོན་གྱི་མཁན་རིན་པོ་ཆེ་ཞིང་གཤེགས་དགེ་འདུན་བཟང་པོ་མཆོག་དང་།གཅོད་པ་ཐར་རིན་ཆེན། གདོང་རྩེ་བསོད་ནམས་བརྟན་པ། བསོད་ནམས་རབ་རྒྱས།
ཕྱོགས་དགེ་རྟ་མགྲིན། རིག་བདག་ཚང་ཡི་དམ་བཅས་ཡོད། སྤྱི་ལོ་༡༩༩༣ ལོའི་ ཟླ་༤ ཚེས༢༩ ཉིན་མདོ་སྨད་སྒྲིག་འཛུགས་ཀྱི་ཚོགས་ཆེན་ཐེངས་བརྒྱད་པ་ཚོགས་རྗེས་ཚོགས་པའི་ངོ་བོའི་ཐོག་སུད་སི་གཞུང་གི་ཁྲིམས་ལུགས་ལྟར་ཐོ་འགོད་ཀྱང་བྱས།
སུད་སི་མདོ་སྨད་རྒྱུན་ལས་ཁང་འདི་ཉིད་འཛུགས་དགོས་པའི་དམིགས་ཡུལ་ནི། གོང་ས་སྐྱབས་མགོན་རིན་པོ་ཆེ་མཆོག་དང་དབུས་བོད་མིའི་སྒྲིག་འཛུགས་ཀྱི་རླབས་ཆེན་དབུ་ཁྲིད་འོག་དབུས་མདོ་སྨད་ཆོལ་ཁའི་བཀའ་ཁྱབ་བཞིན་སུད་སིར་གནས་བཞུགས་མདོ་སྨད་པ་ཡོངས་ཀྱིས་བོད་མིའི་ལས་འགན་ལེན་ཐུབ་དང་ཕྱོགས་ཡོངས་ནས་འཐུས་ཚང་ཡོང་ཆེད་ཤུགས་བསྣོན་བྱ་རྒྱུ་དང་། སུད་སིར་གནས་བཞུགས་མདོ་སྨད་པ་ཚོས་བོད་ཀྱི་རིག་གཞུང་སྤྱི་དང་། ལྷག་པར་ཏུ་མདོ་སྨད་ཡུལ་ལུང་ཁག་གི་སྲོལ་རྒྱུན་རིག་གནས་ཉར་ཚགས་བྱེད་ཆེད་འབད་བརྩོན་ལྷོད་མེད་གནང་རྒྱུ་མ་ཟད། བོད་ནས་སུད་སིར་གཉེན་འཕྲད་དུ་ཕེབས་པའི་མདོ་སྨད་པ་རྣམས་ལ་བཙན་བྱོལ་སྤྱི་ཚོགས་ཀྱི་གནས་སྟངས་དང་། གོང་ས་མཆོག་གི་མཛད་འཕྲིན། དབུས་བོད་མིའི་སྒྲིག་འཛུགས་ཀྱི་མཛད་རྗེས་ངོ་སྤྲོད་བྱ་རྒྱུ་བཅས་ཡིན།
ཕྱི་ལོ༢༠༡༠ ལོའི་སྔོན་ལ་ཚོགས་པ་འདིའི་མིང་ལ་སུད་སི་མདོ་སྨད་སྒྲིག་འཛུགས་ཞེས་འབོད་པ་དང་། ཕྱི་ལོ་༢༠༡༠ལོའི་ཟླ་༦ཚེས་༢༩ ཉིན་ས་གནས་རྒྱུན་ལས་སྐབས་བརྒྱད་པའི་ཚོགས་འདུ་ཐེངས་དང་པོའི་བསྐྱངས་བའི་སྟེང་། བོད་མི་དམངས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་སུད་སིར་ཕེབས་པ་དང་སྟབས་བསྟུན་སྐུ་ངོ་ཚོགས་གཙོ་མཆོག་དབུ་བཞུགས་ཐོག་སྐུ་མགྲོན་དུ་གདན་འདྲེན་ཞུས་ཏེ་ཁོང་གི་སྒྲིག་འཛུགས་འདིའི་མིང་ལ་སུད་སི་ས་གནས་མདོ་སྨད་རྒྱུན་ལས་ཞེས་བཅོས་བསྒྱུར་གནང་བ་བཅས་སོ།